Gwneud cais i'r brifysgol

Gwneud yn siŵr eich bod yn dewis y cwrs sy’n iawn i chi yw rhan bwysicaf eich cais. Bydd angen meddwl yn ofalus am sawl penderfyniad:

• Pa bwnc?
• Pa gwrs? Dysgwch fwy ar Ddewis cwrs yn 18 oed
• Llawn amser, rhan-amser neu ddysgu o bell?
• Beth am gwrs gradd rhyngosod?
• Beth yw'r rhagolygon o ran gyrfa?
• Pa gwrs sy'n angenrheidiol ar gyfer eich syniad am yrfa?
• Beth yw'r gofynion mynediad?

Dechreuwch gydag UCAS Search Tool (dolen Saesneg) er mwyn chwilio am gyrsiau, ac ymchwiliwch yn fanylach o lawer trwy ddefnyddio gwefannau prifysgolion unigol.

Byddwch yn astudio ac yn byw yn y brifysgol a ddewiswch am 3 blynedd neu fwy, felly mae’n bwysig eich bod yn ystyried eich penderfyniad ac yn ystyried y cwestiynau hyn i'ch helpu i benderfynu:

• A ydych eisiau bod ymhell o’ch cartref neu'n agos ato?
• A fyddai’n well gennych brifysgol ar gampws neu brifysgol mewn dinas?
• Pa glybiau neu gyfleusterau prifysgol sy’n bwysig i chi, er enghraifft clybiau chwaraeon prifysgol?
• Pa mor ddrud fydd byw yn y dref neu’r ddinas?

Gall rhai prifysgolion gynnig cymysgedd o ddiwrnodau agored 'ar-lein' ac 'yn bersonol'.

Gallwch wneud digonedd o ymchwil ar wefannau prifysgolion, ond nid yw hynny byth cystal ag ymweld â’r brifysgol yn ystod diwrnod agored. Defnyddiwch opendays.com (dolen Saesneg) i weld pryd y mae prifysgolion yn cynnal diwrnodau agored ac ewch i weld drosoch eich hun.

Gallwn eich helpu i baratoi a gwneud yn fawr o ddiwrnodau agored prifysgolion.

(Mae'r dolenni hyn yn Saesneg yn unig)

• UCAS
• The Uni Guide
• Guardian University Guide
• The Complete University Guide
• Opendays.com
• Discover uni
• University Compare
• University Ready - The Open University

Gan ddibynnu ar y cwrs a’r brifysgol, efallai y bydd angen ichi sefyll prawf dawn neu brawf derbyn, neu gyflwyno portffolio o’ch gwaith. Dyma rai enghreifftiau:(Mae'r dolenni hyn yn Saesneg yn unig)

• Ar gyfer y rhan fwyaf o gyrsiau Meddyginiaeth, Deintyddiaeth a Gwyddor Milfeddygaeth, fe fydd angen ichi sefyll prawf dawn fel University Clinical Aptitude Test (UCAT) neu Biomedical Admissions Test (BMAT)
• Mae gan Rydychen a Chaergrawnt asesiadau a phrofion derbyn cwrs-benodol
• Efallai y bydd yn rhaid cwblhau LNAT– National Admissions Test for Law ar gyfer cyrsiau yn y Gyfraith
• Ar gyfer nifer o gyrsiau yn y celfyddydau a chyrsiau creadigol, fel Ffotograffiaeth neu Bensaernïaeth, bydd angen cyflwyno portffolio o’ch gwaith

Edrychwch ar wefan y brifysgol neu UCAS i weld pa brofion neu gyflwyniadau o fath arall sy’n ofynnol ar gyfer eich cwrs, ynghyd â’r amserlenni ar gyfer sefyll y prawf neu gyflwyno gwaith.

Beth am ymarfer defnyddio profion enghreifftiol ar-lein. Rhowch ddigon o amser i chi eich hun ar gyfer paratoi’r portffolios neu’r cyflwyniadau eraill angenrheidiol.

Gwiriwch yr amserlenni ar gyfer y profion neu ar gyfer cyflwyno gwaith. Cofiwch fod y rhain yn aml yn digwydd cyn dyddiad cau UCAS.

Paratoi ar gyfer profion tueddfryd a mynediad

(Mae'r dolenni hyn yn Saesneg yn unig)

• Admissions Tests (UCAS)
• Biomedical Admissions Test (BMAT)
• LNAT – National Admissions Test for Law
• Practise Tests UCAT
• University Clinical Aptitude Test (UCAT)

Eich Datganiad Personol yw eich cyfle chi i wneud i’ch cais serennu. Mae eich datganiad personol cyn bwysiced â’r cymwysterau a’r graddau a gewch. Dechreuwch trwy baratoi a drafftio eich datganiad yn fuan. Efallai y byddwch angen llunio sawl drafft cyn ichi fod yn fodlon ag ef:

• Ewch i wefan UCAS i gael gwybodaeth ar sut i ysgrifennu datganiad personol. Edrychwch ar how to write a UCAS undergraduate personal statement (dolen Saesneg)
• Ymchwiliwch i enghreifftiau pwnc-benodol o ddatganiadau personol. Ceir rhai enghreifftiau ar  www.thestudentroom.co.uk ac www.universitycompare.com (dolen Saesneg) ond cofiwch beidio â chopïo
• Ysgrifennwch eich datganiad er mwyn dangos eich addasrwydd a’ch diddordeb yn y cyrsiau yr ydych yn ymgeisio amdanynt. Cofiwch mai un datganiad personol yn unig y gallwch ei gyflwyno ar gais UCAS
• Gofynnwch i athrawon, ffrindiau a theulu i brawf-ddarllen eich datganiad

Cofiwch y byddwch hefyd angen geirda gan eich ysgol neu eich coleg. Dewch i wybod mwy am ddod o hyd i eirda ar dudalen References for UCAS undergraduate applications (dolen Saesneg).

Mae prifysgolion eisiau gweld eich bod wedi ymrwymo i’r cwrs, y pwnc neu’r maes gyrfa. Mae profiad gwaith nid yn unig yn ffordd wych o roi cynnig ar eich syniadau am yrfa, ond hefyd gall helpu i ddatblygu’r sgiliau y byddwch eu hangen a dangos eich angerdd dros y pwnc.

Dewch i wybod sut i wirfoddoli neu gael profiad gwaith.

Ffordd arall o ddangos eich ymrwymiad a’ch angerdd dros y pwnc neu’r cwrs yw trwy fynd i’r afael â gweithgareddau cyfoethogi academaidd neu ‘weithgareddau uwch-gwricwlaidd’. Bydd y rhain yn ychwanegol at eich gwaith cwrs arferol. Gallech wneud y canlynol:

• Darllen am y pwnc, a sicrhau eich bod yn gyfarwydd â’r materion diweddaraf yn y maes
• Ymuno â chymdeithasau a mynychu darlithoedd ychwanegol
• Tanysgrifio i gyfnodolyn neu gylchgrawn perthnasol
• Neu fe allech hyd yn oed sefydlu eich clwb pwnc-benodol eich hun yn eich ysgol neu eich coleg

Bydd y gweithgareddau hyn nid yn unig yn dangos eich ymrwymiad a’ch cymhelliant, ond hefyd eich bod â meddwl ymchwilgar ac angerdd dros ddysgu.

Cewch fwy o syniadau yn yr erthygl 'The 34 Best Super-Curricular Activities for Applicants to Top Universities' ar Oxford Royale Academy. (dolen Saesneg)

Efallai y byddwch yn cael eich gwahodd i gyfweliad neu glyweliad. Bydd hyn yn amrywio, gan ddibynnu ar y pwnc a’r brifysgol. Mae rhai enghreifftiau’n cynnwys:

• Ar gyfer y rhan fwyaf o gyrsiau meddyginiaeth, deintyddiaeth a gwyddor milfeddygaeth, byddwch yn cael eich gwahodd i gyfweliad
• Efallai y bydd yn rhaid mynd i gyfweliad ar gyfer cyrsiau galwedigaethol eraill, fel nyrsio
• Mae Rhydychen a Chaergrawnt yn cynnal cyfweliadau
• Fel arfer bydd angen mynd i glyweliad ar gyfer cyrsiau yn y Celfyddydau Perfformio

Gwiriwch y manylion derbyn ar gyfer y brifysgol a’r cwrs yr ydych yn ei ystyried. Edrychwch ar undergraduate interview invitations ar UCAS. (dolen Saesneg)

Ymchwiliwch i cyllid i fyfyrwyr yn y brifysgol yn gynnar a gwnewch nodyn o'r dyddiadau cau ar gyfer ceisiadau am gyllid. Dysgwch fwy ar wefan Cyllid Myfyrwyr Cymru.